Тропа́рь, глас 3:

Це́ркве Ру́сския сто́лпе непоколеби́мый,/ благоче́стия пра́вило,/ жития́ ева́нгельскаго о́бразе,/ священному́чениче Мака́рие,/ Христа́ ра́ди пострада́вый да́же до кро́ве,/ Его́же моли́ усе́рдно,/ я́ко Нача́льника и Соверши́теля спасе́ния,/ Русь Святу́ю утверди́ти в Правосла́вии// до сконча́ния ве́ка.

Конда́к, глас 2:

Восхва́лим, ве́рнии,/ изря́днаго во свяще́нницех,/ и сла́внаго в му́ченицех Мака́рия,/ Правосла́вия побо́рника и благоче́стия ревни́теля,/ земли́ Ру́сския кра́сное прозябе́ние,/ и́же страда́нием Небесе́ дости́же/ и та́мо те́пле мо́лит Христа́ Бо́га// спасти́ся душа́м на́шим.

Моли́тва

О святы́й и всехва́льный уго́дниче Бо́жий, священному́чениче Мака́рие! Подвиза́вся в земли́ на́шей Оренбу́ржстей, де́лы благи́ми зело́ украси́лся еси́: моли́твою непреста́нною, труда́ми мно́гими о благоле́пии церко́внем, и е́же о па́стве твое́й попече́нием Бо́гу угоди́л еси́; наипа́че же по́двигом страда́ния твоего́ за Христа́ да́же до сме́рти И́мя Его́ на земли́ просла́вил еси́! Мо́лим тя́ ны́не, сро́дницы твои́ су́ще: исхода́тайствуй у Влады́ки долготерпели́ваго и всеми́лостиваго Го́спода на́шего Иису́са Христа́ все́м вся́ ко спасе́нию поле́зная: наро́дом Оте́чества на́шего ми́р и к позна́нию Бо́га И́стиннаго ра́зум све́тлый; земли́ Росси́йстей от наше́ствия супоста́т кре́пкое защище́ние; прави́телем му́дрость и вразумле́ние; боля́щим исцеле́ние, плене́нным свобожде́ние, от гла́да и земли́ трясе́ния сохране́ние. Все́м же на́м, о́тче святы́й, да́руй дру́г ко дру́гу любо́вь, я́ко да не и́менем то́кмо, но и са́мым де́лом христиа́ны яви́мся, и в ми́ре доброде́тельное поживе́м житие́ во вся́ком благоче́стии и чистоте́. О, моли́твенниче на́ш те́плый, страстоте́рпче Христо́в Мака́рие! Ты на земли́ живы́й, никого́же презира́л еси́, но и ко враго́м свои́м ми́лостив бы́л еси́; те́мже ны́не, во Ца́рствии Отца́ на́шего на Небеси́ водворя́яся и неизрече́нныя любве́ и благода́ти Его́ наслажда́яся, не забу́ди на́с, убо́гих и немощны́х, твоея́ по́мощи и утеше́ния прося́щих! Да не поги́бнем до конца́, злы́ми на́выки, а́ки пу́тами кре́пкими, окова́ни су́ще и от вселука́ваго врага́, а́ки приста́вника лю́таго, зело́ стужа́еми. Сего́ ра́ди при́зри ми́лостивно, свя́тче Бо́жий, и во обстоя́нии су́щим на́м ру́ку по́мощи ско́ро простри́. На вся́к де́нь мы́сль бла́гу, е́же до́брое твори́ти, в сердца́ на́ша вложи́. Моли́тве умносерде́чней, терпе́нию без ропта́ния и смире́нию нелицеме́рному на́с научи́. Наипа́че же да́руй на́м стра́х Бо́жий, и́же е́сть вся́кия прему́дрости нача́ло, да те́м руководи́ми, вся́ за́поведи Христо́вы ле́гце исполня́ти навы́кнем, и в Не́м вси́ еди́но бу́дем, и невече́рняго дне́ Ца́рствия Его́ дости́гнем, иде́же в ра́дости духо́вней се́рдца, покая́нием очище́ннаго, просла́вим Отца́ и Сы́на и Свята́го Ду́ха, Еди́наго в Тро́ице Святе́й сла́вимаго Бо́га, во ве́ки веко́в. Ами́нь.

Велича́ние:

Велича́ем тя,/ священному́чениче Мака́рие,/ и чтем святу́ю па́мять твою́:/ ты бо мо́лиши за нас// Христа́ Бо́га на́шего.